alwahatech

alwahatech (http://www.alwahatech.net/vb/index.php)
-   واحة الشعر الشعبي (http://www.alwahatech.net/vb/forumdisplay.php?f=105)
-   -   أبقاي على خير يا هذا الدشرة (http://www.alwahatech.net/vb/showthread.php?t=52948)

slimane2222 11-11-2016 07:52 AM

أبقاي على خير يا هذا الدشرة
 
[عزيزي الزائر يتوجب عليك التسجيل لمشاهدة الروابط .. للتسجيل فضلاً اضغط هنا]







أبقاي على خير يا هذا الدشرة

[عزيزي الزائر يتوجب عليك التسجيل لمشاهدة الروابط .. للتسجيل فضلاً اضغط هنا]

الممثل الفكاهي و النائب السابق أحمد بن بوزيد
المعروف بـــ " الشيخ عطاء الله " .. رحمه الله

ابقاي على خير يا هذا الدشرة ** اللي غاشيها غير فلان يصك فلان
راني حالف مانولي ذا المرة ** يا لو كان نموت في صحرا عطشان
نعشر بر الروم و بلاد الكفرة ** لا نعشر بر الشمايت و الرعيان
حديث تنوفيق و الضحكة صفرة ** و الصحبة تحيا و تفنى بالقضيان
بلسانو يعطيك قنطار مصرة ** و الحيلة متلمدة تحت البيطان
بالرشوة تلقاه ماشي للعمرة ** و يصلي في البيت في آخر رمضان
و كي يولي بكلاح و عباية صفرة ** و يعطيها للزور و كلام البهتان
يحلفلك اليمين قداه من مرة ** يحلف بالكعبة و يحلف بالقرآن
و يحرم لبزوز و يحرم لمرا ** و غير يصد عليك تلقى كذبو بان
اخزيهم يا خالقي في ذا الدشرة ** ذا القوم اللي حليفها ما فيه امان
_______________________

أبقاي على خير ياهذا الحفرة ** اللي يحكمها غير الجاهل و الخوان
تلقى لي ملوا غبار السبورة ** للسياسة داخلين بلا سلطان
المرفوعة تاليتها مجرورة ** العطف يوروه غير لفلان و فلان
و الفعل المجهول مبني بالكسرة ** و الاسماء الخمسة يديرو ليهم شان
تلقى المير حمار ، النايب بقرة ** و المجلس ثعبان يقتل في ثعبان
ما تفرز أمي على واحد يقرا ** و لا تفرز صاحي على واحد سكران
غير هيدورة لا صقا في هيدورة ** و غير خاين مدسوس في وسط الخيان
و كي لكلاب مدربين على الحقرة ** و يا ويح اللي جاهم بين النيبان
كي تسمع لحديثهم عند الهدرة ** تقول انت الابطال هادو و الشجعان
ولو تعجنهم ما يجوا في ساق مرا ** ولو توزنهم ما يوفو لك ميزان
_______________________

و كي الغراب منين يعلى في شجرة ** يحسب الخلق تحتو غير ذبان
ابقاي على خير يا هذ الدشرة ** اللي لاحت تاريخها في عقب زمان
يا سعد الي جا موظف من برا ** بلوصلة يحضا عزيز و مولا شان
يدولو لفراش و يزيدوه مرا ** كل خميس عشاه مشوي عند فلان
ما يحتاج لا حليب و لا خضرا ** كلش خالص جاي من عند الرعيان
هذا باهز جايب مخدة حمرا ** و هذا يجري جايب قريعات دهان
وتلقى المشمت غير توصل في الهدرة ** و تلقي المرعن غي تجرجر فالخرفان
اخزيهم يا خالقي في ذا الدشرة ** ذا القوم الي شانها ما جا كي شان
_______________________

و ارزقهم لعجاج و معاه الغبرة ** و زلط اللي بدراهمو يصبح جيعان
اذا راد الله من هذا المرة ** ما نرجعش خلاص لبلاد الرعيان
و نقول على خير يا هذا الحفرة ** راها ليكم يا المشمت و الرعيان
ما رانيش على الرجال اهل النعرة ** اللي كلمتهم ما لقات منين تبان
و ما رانيش على لبزوز اللي تقرا ** و ما رانيش على اللي سكنو في لكفان
و ما رانيش على الشجرة و الحجرة ** و ما رانيش على الوليا و الحيوان
مقصودي رعيان ما ليهم جرة ** كي عكست الايام ولا ليهم شان
كانو مدسوسين في وقت الكثرة ** و ياسر منهم كان في صف العديان
و دركة جاب شهود و دخل في الثورة ** و خرج عندو كاميو و قهوة و بلان
و لحقلو رابيل حج و زاد مرا ** اصبح في التاريخ يفتي بالبرهان
و يعود يقول بيا واش صرا ** كي كنا فالجيش انا و حياة فلان
فوق حمار و لاحقتني طيارة ** و ذاك الشي و اضربتها بين الجنحان
و اهجمت على شار بعمود و حجرة ** دقدقتو و قديت في جدو النيران
اخزيهم يا خالقي في ذا الدشرا ** ذا الحرك اللي عايشة كي البهتان
ارحم من شافو الكحلة و المرة ** و ماتو شهداء على الصدق و الايمان
ارحمهم بالحور في الجنة الخضرا ** و اسكنهم با خالقي خير الجنان

.. فيديو ..

[عزيزي الزائر يتوجب عليك التسجيل لمشاهدة الروابط .. للتسجيل فضلاً اضغط هنا]



الساعة الآن 09:14 AM.

Powered by Alwaha® Version
Copyright ©2000 - 2024, Jelsoft Enterprises Ltd.

Adsense Management by Losha

new notificatio by 9adq_ala7sas
alwahatech.net